-
Səni düşünmək
Səni düşünmək,
Həyatı düşünməkdir.
Torpaq altında
Dar-düdük bir qəbirdə
Günəşi düşünməkdir.
Qarlı gecədə,
Qıfıllanmamış qapıları,
Qaçmağı düşünməkdir həbsxanada.
Səni düşünmək dəyərlidir,
Ən azı
Adamın qəlbindən
Bir bulaq coşar,
Bir at gələr orada su içər,
Bir quş gələr orada oxuyar...
Həsrət
Duman boruları,
Antenlər,
Qarqalar,
Sadəcə
Keçmişimdən bunlar yadıma gəlir.
Pəncərədən
Eşiyə baxdığım günlərdən...
Sizin apartmanız
Uzaqda idi,
Yerlə göy üzü qovuşan yerdə...
Rəsmdə görünməyən paslı piano
Yalqız adamın rəsmi,
Uzun bir küçədir.
Və onun dibində olan
Bağlı qapı.
Yalqız adamın rəsmi,
Rəsmdə görünməyən
Paslı pianodur.
Yalqız adamın rəsmi,
Əsən yeldir,
Solğun ay.
Yalqız adamın rəsmi,
Bütün kədərlərin rəsmidir...
Qalabalıq
Mənə elə gəlir
Çin məhəllələrində itmişəm
Hər yer hay - küydü
Hər yer qalabalıq.
Keşkə
Sarı bir əjdəha qarşıma çıxıb
Məni udsun!
Son qoysun bu itgin düşməyimə.
Nə çətin bir işdir
Qalabalıqda yalqız yaşamaq...
Diyaloq
- Ölümdən sonra həyatı inanırsan?!
- Yox!
- Ama inan
Səndən sonra diri qaldım
Qar altından
qurtarılan dağçı kimi!
Kravat
Yavaş - yavaş modernləşirəm
Masa arxasında
Yemək yeyirəm
Kravat bağlayıram
Rəp musiqisinə
Qulaq asıram
İnternetdə
Sevdiyim şairləri izləyirəm
Yavaş - yavaş
Özümdən çıxıram
Tosbağa balası yumurtadan çıxan kimi
Yenidən doğulmaq
komik də olmuş olsa
Çox gözəl və həyəcanlı bir şeydir!
Kiçik gəmi
Dənizi görərkən
Qanım maviləşər
Ürəyim
Qağayıya dönər
Dənizi görərkən
Dənizə dönərəm
Xırda bir dənizə.
Qafam
Bir kiçik gəmi kimi
Yelkənini qaldırar...
Ağ ölüm
Atam yayda öldü
Ölüm mavi idi.
Payızda öldü Leyla
Ölüm sarı idi.
Yaşar
Baharda öldü
Ölüm yaşıl idi.
İndi mən borcluyam bir ağ ölümə!
Toz
Keçmiş
Yıxılmiş bir qəfədi
Ölmüş bir ağ at.
Paslı bir topança
Sınıq bir güzgü.
Qoca bir qanqester
Şeirimdən keçir.
Adsız bir şeir
Tankların borusundan
Həm cənnətə yol var
Həm də cəhənnəmə.
Şübhəsiz
Əsgərlər cənnətə gedəcəklər
Diktatorlar, cəhənnəmə.
Dayça
Ardımdakı evlərdən
Bezikmişəm
Dənizə sarı qaçıram!
Uçuram qanadsız.
Dəniz, uzaqdan
düşünə bilmir!
Ona sarı qaçan
İnsanmı
Ya da ki dayça?!
