A = B = C
(şeir-esse )
A
necə də bir-birinə bənzəyər hər şey: insanlar, ağaclar, quşlar, çiçəklər,
şəkillər, güzgülər, qapılar, pəncərələr...
stəkandan qurtum-qurtum içilən su qurtum-qurtum azalar.
insan sudu - üzü aşağı axar, damla-damla tükənər; indiki halı şəklində
görünsə də, keçmiş halıdı gələcəyin.
dəyişən halıyla süzgəcdi yaranan nə varsa bu yer üzündə, zaman qərar tutmaz, gələcək keçib ondan süzülər keçmişə,
insan ağacdı: yarpaq-yarpaq tökülər, ağac insantək yarpaq-yarpaq ürək
itirər. insan quşdu-uçmağı sevər, nə qədər uzağa uçsa da yenə ucalıqdan
yorulmağı var.
daima ucalıq qorxusu yaşar, çıxa bilməz yerin cazibə qüvvəsindən.
nə az, nə çox, cəmi 4-dü insan: dolar boşalar, axar azalar, alışar yanar,
ovular çat-çat olar.
sonda yenə torpağa dönər; ya bərk, ya da maye şəklində.
Avstriyada meyitləri yandırmağa başlayıblar - söyləyəndə yaman güldürmüşdün
qohum- qardaşı.
hərdən adamın içində özünə cəza vermək tələbi doğur, özünə
hökm çıxarmaq istəyi olur.
bəzən lap yanıb kül olmaq keçir könlündən.
işdi yandırarsalar meyitimizi, eybi yox, oğul,- 70 kilo azalar cənazəmdən.
kənd evimizdən qəbirstanlığa təxminən 1 kilometr olar.
B
insan bir az da qapıdı, açılıb-örtülər. açılıb-örtülən qapılardan evlərin təngnəfəsliyi
duyular.
döyülər qapılar, elə hey döyülər.
ayrılıqdı, görüşdü, həsrətdi, sevgidi, nifrətdi qapı. insan həm də pəncərədi- görünər hər iki tərəfi.
pəncərə- hüdudsuzluga çıxışın işarəsi, həyatın dördbucaqlı mənzərəsi. girişdi,
çıxışdı, şəkildi, güzgüdü pəncərə. bir də hüdudsuzluq və bir də məhdudiyyətdi
pəncərə.
hər şey bir-birinə bənzər, hər şey bir-birinin təkrarı, hər şey bir-birinə
bərabər həm də: A B-yə, C B-yə bərabərdisə, demək, C A-ya da
bərabərdi: A = B = C.
ağac həm də quşdu, quş – balıq, balıq- su, su- torpaq, torpaq- insan,
insan- idrak, idrak- allah, allah- kainat.
göy üzü- dəniz, ulduzlar- çiçək, çiçəklər-kəpənək, kəpənəklər- uçuş;
uçuşun nə olduğunu heç nə anlada bilməz kəpənək uçuşu qədər.
budaqdan asılıb yırğalandıqca uçmaq keçər könlündən, amma unutma:
budaq qırıla da bilər.yıxılmaq uçmağa bənzəsə də ölümü də xatırladar.
qırılan yeri budağın ayrılıqdı, ağrıdı, acıdı, həsrətdi- anlaya bilsən.
iki əli, iki ayağı üstə düşər yıxılan adam bəzən- özünü qoruma instinki.
əyilib iki əli, iki ayağı üstə keçər ayaq üstə keçə bilmədiyi yerdən.
heyvan bir az da əyilmiş şəklidi insanın.
pəncərə canlı şəkildi sanki asılıb otaqdan.güzgü şəklin hərəkət halı.
qartal duruşu ilə Azəbaycanın xəritədəki şəklinə bənzər Ramil Səfərov.
bağışla, qardaş, kövrəlməkdən savayı əlimizdən nə gəlir ki, “ cənab leytenant”
mahnısı oxunan zaman – özü də oxuyan Şəmistan ola- bir də səni sevməkdən
başqa.
ayrılıqdı, həsrətdi, nisgildi, ağrıdı, acıdı insan.
C
hər şey bir-birinin təkrarı, hər şey bir-birinə bənzər, hər şey bir-birinin içində
həm də, bir-birinin altçoxluğu: B A-ya, C B-yə daxildisə, o zaman C A-ya da
daxildi – riyazi məntiq.
sevgi insanın içində, xəyanət sevginin, ağrı xəyanətin, acı ağrının, həsrət acının.
əgər kimsə səni sevdiyini söylərsə, bil ki, xəyanət də istisna deyil. kimsə nifrət
edərsə, nə zamansa sevə də bilər.
zamanı daha çox zamana şahid köhnə saatlar anladar – fırlasan oxlarını geriyə
döndərə bilməzsən yaşananları. yaşanmış sevdasan, zamantək geri dönməzsən;
keçmiş zamansan artıq.
sevgi ismarıcları süni yaddaşlarda, neçə baytlıq sevgi uyuyar elektron xatirələrdə;
yerini verməz saralmış vərəqlərdəki sevgi məktublarının.texniki tərəqqi – ülvi
hisslərin qənimi.
süni intelektin zamanı gəlir; əlvida sevgilərə, əllər yuxarı!
mübarizə varsa, məğlubiyyət də var.
qələbə - rəqibi məğlub etmək yox, öncə özünə qalib gəlmək məharətidi.
mübarizə varsa, məğlubiyyət savaşın içində, qələbə məğlubiyyətin.
A = B = C
hər şey bir-birinin içində, hər şey bir-birinin bənzəri, hər şeyin öz
tutumu amma.
heç nə tutumundan artığını götürməz, insan da.
ağaclar, quşlar, otlar, çiçəklər, ulduzlar, səma, sevgi, nifrət, həsrət,...,
allah insanın içində tutduğu qədər. dunya allahın içində.
hər şey bir-birinin təkrarı, hər şey tək-tənha amma, hər şey çox həm də:
dolub - daşar stəkandakı su kimi, axar zamantək – geri dönməz, azalar
insansayağı - asta-asta hopar torpağa;
A-lardan, B-lərdən, C-lərdən birinin bətnində
E L Ə
A-lardan, B-lərdən, C-lərdən birinə dönər.
... - 25.05.2010.
